Pov Yob Khu Maab (phaaj 3)
Xyob Kaav (1918)

Yawm Pov Yob Vaaj yug xyoo twg tsw paub lawm.  Nwg txwv hu ua yawm Khu Maab Vaaj, taab sws tsw paub nwg nam npe lawm. Tsaws le cov laug tau has tseg tas yawm Pov Yob yog ib tug txawj ntse hab muaj peev xwm heev. Lub swj hawm peb cov yawm koob tswv suav teb lug tsua lub teb chaws Lostsuas mas suav pum leej twg tug qos puj los yog tug ntxhais zoo nkauj tes suav cia le muab nqug-txhaav coj moog yuav ua qos puj le lawm. Yawm Pov Yob tau nqaa loo ntaaj moog caav moog has ntsug tsua cov suav ntawd hab kuj moog has tau txhua leej txhua tug cov qos puj hab ntxhais tsov qaab lug lawm. Thaum tswv lug txug tsua lub teb chaws Lostsuas lawm, nwg kuj yog ib tug txawj ntse txug faab kiv has plaub tu ntug. Nyob tsua ib ntsug teb chaws ntawd muaj cov nom Hmoob txawj ntse coob tug taab sws yawm Pov Yob tseem yog tug txawj ntse tshaaj suav dlawg. Kiv txav plaub ntug ces yeej tsw muaj leej twg lub tswv yim has yeej nwg le.

Dhau le ntawd lawm yawm Pov Yob tseem yog ib tug txwv neeb kws tshaj lij heev. Nwg ua neeb leej heev hab muaj peev xwm moog cawm tau cov tuab neeg mob kws twb yuav tuag ciaj tsov qaab lug, hab nwg muaj peev xwm pum dlaab hab has yeej dlaab tuab sw. Kwv tij neej tsaa nyob dleb le 3 nub kiv los tseem tuaj hu yawm Pov Yob moog ua neeb paab cawm puab tug tuab neeg muaj mob.  

___________________________________________________________________________

Nchaiv Yig Txawj Pov (phaaj 3)   
Xeeb Loob (1932)
Phes Loob (1940)

Yawm Nchaiv Yig Vaaj yug xyoo twg tsw paub lawm. Nwg txwv hu ua Yawm Txawj Pov Vaaj, taab sws tsw paub nwg nam npe. Yawm Nchaiv yig yog ib tug txawj ntse hab muaj txuj kiv coj ncaaj nceeg. Yawm Nchaiv Yig tau ua ib tug Xeeb Loob hab Los Phes kws num tswv nplog tuaj tsaa. Lub caij ntawd mas tsw yog ib zej tsoom Hmoob nyob lub teb chaws Lostsuas ntawd xwb, taab sws muaj lwm haiv tuab neeg (Pub Thawj, Cu & Maab) los yeej tuaj zwm coob heev tsua Yawm Nchaiv Los Phes hab suav dlawg huab hwm nwg heev.

Yawm Nchaiv Los Phes txuj kiv zoo tsua cuab pej xeem yog muab txuj kiv ncaaj nceeg faab kiv tu plaub ntug, kiv them se tsua tsoom fwv, hab paab cawm tsoom cuab pej xeem kws txom nyim tsua txuj kiv muaj noj muaj haus.  Vim nwg txuj kiv txhawj ntse, ncaaj nceeg, hab hlub tau cuab pej xeem txhua tug kws tuaj ntshav kiv paab ntawd nwg. Yog le ntawd yawm Nchaiv Yig lub meej mom thaj ntsov nto moo lug, ua tsua nwg cuab pej xeem nyob kaaj sab hab ua lub neej muaj txuj kiv cia sab.

CEEB TOM: 

*Peb cov kwvtij kws tau ua nom ua tswv mas muaj coob tug taabsws peb Koom Hum tau xaiv Yawm Pov Yob hab Yawm Nchaiv Yig ob tug le miv ntswv keebkwm lug tso tsua phoontawv nuav xwb. Cov kwvtij mej leej twg ho paub txug Yawm Pov Yob hab Yawm Nchaiv Yig ob tug le keebkwm zoo, thov paab qha tsua peb Koom Hum. Koom Hum yuav muab sau ntxiv kuas ntau le ntau tau tsua lwm zag ua keebkwm tsua peb tej xeebleej xeebntxwv khaws tseg.

Tseem tshuav peb cov pujyawm ua nom ua tswv ntau tug tsws tau teev tsua huv phoontawv nuav taabsws tom ntej nuav Koom Hum yuav tshawb hab muab teev kuas txhwj txhua tseg ua keebkwm.

**Tsis taag le ntawd xwb, xaav qha tsua cov kwvtij suavdlawg paub tas nyob tsua huv Koom Hum phoontawv zag nuav yuav muaj tsw taag peb cov kwvtij txhuatug xws le “Namtub Txwnyuas”, cov “Namtxwv” kws txawj peb hmoob kaablig kivcai hab cov “Tubntxhais” kawm ntaubntawv qeb sab. Vim muaj ib cov peb Koom Hum nug tsw tau, hos ib cov puab tseem tsw tau muab tuaj.  

Xaav kuam cov kwvtij kws tseem tsw tau muab npe tuaj los ho muab tuaj tsua Koom Hum yuav muab teev-zwm tseg. Hos cov Koom Hum tseem tsw tau nug txug los yog koj nov txug Koom Hum lawm, thov koj paab qha tuaj tsua Koom Hum. Dhau le ntawd lawm Koom Hum yuav nug ntxwv kuam txhua cuab kwvtij hab muab lug teev-zwm tseg cia fuabcua ua puav pheej.

Yog koj muaj lugnug ntxiv, xaav kuas koj hu ncaaj ntsaim ntsug Koom Hum thaam, Koom Hum yuav zoo sab ntsug koj thaam hab teb koj tej lugnug tsaws le Koom Hum lub homphaj.

 
Ua tsaug,

United Vang Foundation